حينما إنقطعت الكهرباء بمنزلنا .....رفعت السماعه

في شهر من شهور سنة2005م :-

ماما: يلا يابني علشان نروح لدكتور الأسنان إتأخرنا ..
أنا : يوووه هو أنا مش هخلص بأه من الدكتور ده
ماما : خلاص هانت إنهارده أخر كشف وتخلص
أنا : طب من أجله ليوم تاني
ماما : ماينفعش إزاي الدكتور يديك ميعاد وتغيره بمذاجك يلا يابني بطل غلبه!!
أنا : اصل النهارده هيجي علي دريم 2 برنامج عن الدكتور أحمد زويل وعاوز أشوفه
ماما : يابني إبقي إتفرج علي الإعاده مش مشكله ياعني
أنا: يا ست الكل ممكن مكنش فاضي يومها ....ففرصه النهارده
ماما: يابني ممكن تلحق تتفرج عليه بس إخلص وبطل لكاعه !!!!
أنا: طيب .. أمري لله أما نشوف ...

تنويه: (هذا الحوار السابق دار بيني وبين الست الوالده)

بعد خمسه دقائق :-

- ياااااه يا ماما العياده مليانه ناس كتير وشكلي كد هبات مع الدكتور ده
- أصله دكتور شاطر وديماً عيادته زحمه.
- يا فرحتي ! أنا مالي ومال شطرته أنا عاوز أشوف الراجل اللي مستني برنامجه من زمان
*****إيه الهم ده ( في سري طبعاً)
ولكنني جلست مغلوبأ علي أمري ...... وسكت !!!!

سكوت ....... لا يدوم :-

قلت لنفسي : بدل ما تقرف نفسك كده حاول تتعامل مع الموقف وتتعايش معاه !!!
وعادي ممكن ألحق البرنامج ... هكذا قلت لنفسي

تمر الدقائق والساعه تلو الساعه وأنا مازلت جالساً...
فأخذت أنظر للناس من حولي كأني لم أري الناس منذ أمدٍ طويل !!!

كان كل واحد منهم فاكر نفسه بيتكلم ف صحراء خاليه من البشر محدش سامعهم فيها

*اللي بتتكلم في الطبيخ والمحشيات والهم الناقع
*واللي جوزها مبهدل العيال ومشردهم
*واللي عمالي يلاعب عيل صغير وقرفنا بصداعه وعويله
*وكانت معنا ست مسنه بتحاول السيطره علي نفسها لكنها كانت تحلم في داخلها بسرير دافئ تنام عليه !!!! فأخذت ف النعاس
* وألطف حاجه لما طفلين بيقابلوا بعض ويتكلموا مع بعض خد منهم أحلي صداع !!!!

دي أخرت اللعب بالريموت كنترول :-

الممرضه ماسكه ريموت التليفزيون وعماله تقلب فرحانه بالريموت وتشتيت الناس وراها اللي يقولها سيبي دي يابنتي .... ولكن كان ف واحد دمه خفيف قال بعد إستيقاظه من سباته العميق لو سمحتي ممكن نشوف المصارعه؟؟؟؟؟!!!!
مصرعه إيه ياعم الحج أنا قلبي ما يستحملش هكذا ردت عليه الممرضه

وفي الأخر معجبهاش حاجه .....
...
وفجأه وجدت قناه تبث لقاء حصري مع رئيسنا والإعلامي عماد أديب
ووضعت الريموت بجوارها وفتحت فمها .....
وإخذت تستمع بإنصات لحوار السيد الرئيس
وفجأه أخذت في التثاؤب من شده تأثرها بالكلام !!!!
وكان الرئيس كان مشغولاً بشرب قدحاً من الشاي مع عم فتحي !!!!!- ياهناه يا سعده-
ولكنها لم تغلق التلفاز !!! ولم أعرف لماذا !!!!

البحث عن حل سريع:-

قلت أمرك الله يابني متحطش ف نفسك ....حاول تبص للسقف يمكن تلاقي حاجه تشغلك بدل دوشه العيال !!!!!..... ودوشه التليفزيون !!!!!!

وبالفعل أخذت أنظر للسقف لدرجه أمي العزيزة قالت لي :
إيه هو السقف عجبك للدرجه دي؟؟؟
قلتلها : مش عارف ليه حاسس إنه ميال!!

وفي عز إندماجي في تفرس السقف ووالحلم بأن أمشي عليه مثل أفلام الكرتون وأفعلها كما يفعلها " توم " دائماً في أثناء جريه خلف "جيري ".... !!!!!!

@@نادت الممرضه @@

الأستاذ *** يتفضل !!!
قلت الحمد لله , يادوبك ساعه بالكتير والبرنامج يبدأ
هانت ......

مر الوقت ولم أشعر به:-

بعد فتره لا تتعدي النصف ساعه
- ياريت تستخدم المعجون ده بدل العادي لأن أسنانك حساسه وتشرفنا بعد أسبوع كده
- إن شاء الله يا دكتور
- سلام عليكم

الطريق من عياده الدكتور حتي المنزل:-

كان يفصلنا من العياده حتي المنزل بضعه أمتار قليله و أخذت أسرع الخطي حتي أري الدكتور زويل !!!!
كنت أنتظر لقاءاته بفارغ الصبر وأتابع أخباره من الجرائد ......


الخير علي قدوم الواردين :-

الحمد لله لسه ربع ساعه والبرنامج يجي
أنا :- بابا هات روموتك الجميل ده أصلي عاوز أشوف برنامج جاي عن الدكتور زويل
بابا :- هو هيجي علي قناه إيه؟
أنا:- دريم يا عم الحج
بابا :- طيب ... جاء الزمن اللي عيالنا يفرجونا علي مزاجهم !!!!!

ياليتني لم أمسك ..... ريموت التليفزيون:-

وأثناء بحثي وسط زخم القنوات الفضائيه ........ إنقطعت الكهرباء
يا نهار زي بعضه !!!!
إيه الهم الناقع ده (علي رأي واحد صحبي)

أنا : ياعني أجي بدري علشان أتفرج علي الراجل ألاقي النور قطع !!!!!!
بابا: يابني ممكن تتفرج ع الإعاده عادي
أنا: حتي إنت ياعم الحج بتقول كده
بابا: عموماً النور هايجي علي طول متقلقش
أنا : مش باين !!!!!!

جلست وأنا مغلوب علي أمري شعر بأني أريد ان أهشم شيئاً
مرت الدقائق ودخلت في ساعه كامله ولم تأتي الكهرباء اللعينه حتي الأن !!!!!!

وفي ظل الظلام الدامس جائني هاتف من بعيد:-

قال لي: مش هما قاعدين يصدعونا بأرقام الأعطال في التليفيزون طيب ياعم
جات لحد عندك إتصل بيهم و يمكن تعرف سبب النور قطع ليه !!؟؟؟؟

فنظرت حولي لم أجد أحداً فعلمت أنه الشيطان!!
ولكنه علي صواب !!

فسأت البييييييييييت

-حد عارف نمره أعطال النوور كام علشان أتصل بيهم ؟
-هنعمل بيها إيه؟
-ياعني محدش عارف النمرة كام ؟
-دور عندك في دليل التليفونات !!!!

جريت علي الدليل وكلي أمل أن أجد النمره المخصصه بأعطال الكهرباء
لقيتها.......
وضربت النمره

حينما رفعت سماعه الهاتف الأرضي الحاديه عشر مساءأً:-

تنويه ثاني :(كان هذا الحوار بيني وبين السيد المسؤال في أعطال النووور)

سار هذا الحوار بيني وبين المسؤال بمنعطفين سياسيين !!!!!

الأول كان السيد المسؤال يرغب في قتلي بالرصاص في ميدان عام أو صب العذاب عليا لأني إتصلت بجنابه في تلك الساعه المتأخره
, أما الثاني فتبدل الحال من حالاً إلي حال فسبحان الله كان ملاكـ وشعرت بأنه كان يريد أن يبكي من الفرحه وهو يحدثني.

(1) المنعطف الأول :
- السلام عليكم ورحمه الله
-وعليكم السلام
-لو سمحت يافندم دي نمره أعطال الكهرباء؟
-أيوة هي دي... عاوز إيه ؟؟؟
-النور مقطوع عندنا في الشارع بقاله أكتر من ساعة ونصف كده ..... خير!!
-طيب ... شويه وهايجي
- ياعني قدامه كتير
- أيوة ... أصل في كبل محروق هما شغالين فيه!!!!
-بس بعد إذنك في حاجه مهمه ؟؟؟؟؟
- أيوة
(2) المنعطف الثاني:-

-أنا كنت بره البيت ولسه جاي !
علشان أشوف البرنامج الإنتخابي بتاع السيد الرئيس
وأول ما البرنامج لسه جاي علي الفضائيه المصريه لقيت النور قطع !!!!
قولت العمليه مقصوده بأه ....... فأتصل أعرف إيه الحكاية؟؟ !!!!!

- لأ يا فندم دا الكبل ف مشكله هنصلحه علي طول...... مش مقصوده ولا حاجه !!
- بس هو إسم الشارع اللي في حضرتك فيه إسمه إيه؟
- ********
-ثواني يا فندم والنور ها يجي وهتتفرج علي برنامح الرئيس وهتتبسط كماااان !!!!
-بس ياريت ميتأخرش النور أصلي مستني البرنامج ده بفارغ الصبر!!!!!
-إنت تأمر ياباشا ... , وأسفين للموقف ده إحنا تحت أمرك !!!
-لأ عادي المهم أتفرج علي برنامج السيد الرئيس مع عماد أديب بس
- تأمرنا بحاجه تانيه؟ ...... يا باشا !!!
- شكراً يافندم وأسف للإزعاج
- لأ أبداً ... دا حقك الطبيعي
- طيب ..... سلام عليكم
-وعليكم السلام ورحمه الله

لم يمض الوقت .... كأنه لم يتحرك :-

ولم تمضي دقيقه واحده وجائتنا الكهرباء مره أخري !!!!!
و فتحت التلفاز علي البرنامج الذي طالما إنتظرته كثيراً , لأن تلك الشخصيه كانت تستحق هذا الإنتظار ,,,, كانت تبهرني كثيرها وأكِن لها إحتراماً بالغاً
إنها كانت شخصيه الدكتور أحمد زويل !!

وقبل ما أنسي
من يومها البيت لما تحصل مشكله ويعوزوا يتصلوا بأي مسؤليين كانوا يتركوا لي هذه المهمه :) .
.......... الرجل المناسب ف المكان المناسب !!-!!