منذ سنه بالتمام والكمال تعرفت علي صديق عراقي اسمه " نمير" أي بئر الماء المتفجر ,
إنسان مهذب جداً ومحترم أتي من العراق للدراسه في مصر كمنحه من صدام حسين
للدراسة بجامعه المنصورة
وتعرفت كذلك علي أخوه "وسيم" وكيل نيابه في عهد الرئيس صدام حسين
وأتي إلي مصر بعد حاله الصراع الطائفي بعد أحداث 2004
وتفجير المرقدين الشيعيين بكربلاء
******************
الغريب إن العراقين اللي قبلتهم جميعاً كانوا يرون صدام بطلاً وعند إعدامه شهيد
ولكن وسيم ونمير كانوا يرونه ديكتاتور
وكانوا يسمونه العبد الذي عصي سيده
وأنا كنت بتغاظ جداً لما ألاقيهم يسيئون إليه
ليه مش عارف!
بس أنا شايف إنه مسلم وحرام الشماته فيه
ومش عاوز أغلط وأقع في فخ الأمريكان لتقسيم العرب
*******************
دارت أحداث كثيرة بيني وبين نمير خصوصاً وكنا نتكلم عن العراق وحضارتها
وشعبها وطبعاً حكم صدام حسين وهل كان ديكتاتور أم لا
وممكن كنت بقعد معاه أكتر من ساعتين كل يوم عشان أسمع عن العراق وشعبها
يمكن تعاطف مع شعب له حضاره عظيمه في الأدب والشعر والطب والبلاغه إلخ
*******************
وأغرب حاجه سمعتها عن صدام منه
إنه كان بيعدم في ثلاث حالات:-
الأولي: إهانه حزب البعث ورئيسه طبعاً , صدام
الثاني :متعاطي المخدرات والتجار
الثالث: الزني بأنواعه
وكان الإعدام أمام الناس ويتم عرضه بالتليفزيون
***********************
يمكن كنت بسمع إن أيام صدام كانت الأمية بالعراق صفر
ودا اللي أكده ليا برده
لأن صدام كان فارض التعليم إلزامي
وإجباري لأي سن والمخالف يسجن
وكان مهتم بالصحه والتعليم بالأخص
******************
برده من حكاياته إن صدام كان يعطي الخريج من الجامعه أرض مساحتها فدان
ببلاش طبعاً والحكومه بتساعدك في بنائها
وإنه كان عامل لكل مهنه نقابه مسؤله عن اللي بيشتغلوا فيها
حتي عمال النظافه كمان!
***********************
وإتكلمت كمان معاه عن فدائي صدام وإذاي إنهزموا بسهوله
وحي الفردوس الشهير بتاع صنم صدام كما يسمي
وكيف فرح العراقين وهم يسقطونه
وقالي إنه كان ملهي ليلي وصدام هده وبنا مكانه تمثاله الشهير
**********************
سألته عن مسأله الدهب اللي لقوه مع صدام وهو مقبوض عليه
كدب ده وقالي عمر ماكان صدام حرامي أو سرق بلدنا
هو ظالم أه لكن حرامي لأ
**********************
الغريب إنه قالي إن عدي بن صدام حسين كان عنده نمر بيخده معاه المطعم
يأكله في أيام ماكان العراقيين مش لاقيين عيش حاف
وطبعاً دا كان أيام الحصار علي العراق
****************
ومسأله ضرب الأكراد والشيعه
فهو قال إن العراقيين عارفين إن ده تم بطائرات فرنسية
أجرها صدام لضرب المناطق دي
وأمريكا أعطت خرائط التمرد أيام الإنقلاب الفاشل علي حكمه
**********************
مدام "أسيا" جارتي هي من أهل الموصل
هي عايشه وجوزها وأولادها التلاته ضيوف عندنا بمصر
علاقتي بيها قويه جداً لأني مدرس العلوم لإحدي بناتها "أريج" أي رائحه الزهور
ديماً تقولي أنا بدعي لصدام في صلاتي
هو كان قوي و اللي الإعلام بيصورة مش حقيقي
وحكتلي علي يوم إعدم صدام
وإذي كان مظاهرات في مناطق كثيرة من العراق (سنه -شيعه)
وبتعتبر مصر بلدها التاني
رغم إنها مش عاوزه تعيش في مصر وبيحاولوا يحصلوا علي إقامه بسوريا!!
وطبعاً السبب معروف مش محتاج شرح
***********************
كلمه قالها لي "نمير" قبل أن يسافر من يومان إلي العراق
لزياره أهله بشارع فلسطين ببغداد
قالي بالنص
أنا أموت في تفجير في العراق أحسن من أقعد في بلدكم دي ساعه واحده!
وطبعاً هو قالي ليه وللأسف معرفتش أرد
بس للأسف هو قال حقيقه مره وواضحه ذي الشمس
وبلاش أقولها علشان إنتوا عارفين!!
*****************
قبل ما يسافر بيوم واحد سألته
إنت مندمتش علي موت صدام؟
قال لي: لأ
قلتله ممكن ربنا يغفرله ويدخل الجنه
وفكرته بحديث الرسول (ص)
فيما معناه إن ممكن الواحد يعمل عمل أهل النار ويدخل الجنه
إستغرب أوي وحسيت إنه إتغاظ مني
وقال لي بالنص
أنا لو دخلت الجنه ولقيت صدام هناك هسيبها وهروح حته تانيه
لأن ربنا ممكن يحاسبني علي إني قاعد جنبه!!
*************************
أيام كأس أمم أسيا
كان ديماً يسألني إنت بتابعها
كنت بقول لأ لأني مابحبش الكورة ولا سيرتها
ولكني قلتله أنا متأكد إن العراق هيخدها
ودا كان في أول الدورة ممكن
طبعاً هو إستغرب مني
ولكني قلت له : إن أمريكا هتحاول بأي طريقه تشغل العالم بالنجاح الباهر
للكره في ظل الإحتلال الأمريكي
وإنهم مأحرزوش أي ألقلب منذ نصف قرن
طبعاً هو كان بيفكرني بتريق عليه
ولكن العراق كسب فعلاً
وإقتنع برأيي في النهايه
*******************************
للأسف كتير من العراقيين جيرنا كانوا شيفين
إننا والكوايتين أحد أسباب تدمير العراق!!!
نمير واعدني بصور عن العراق بعد التدمير
وهديه كمان
هيجبهالي لما يرجع
ربنا يرجعه بالسلامه
طلب يقابلني قبل مايسافر وقالي
إدعيلي إني أرجع تاني هو أنا هرجع تاني؟!
الله يرحمك يا صدام هو فعلاً هيحصل ذي ما قلت والعراق هينتصر
نمير .. أهل العراق... إحنا أسفين ....سامحونا
