كلام قيل بالفعل

-1-
سألني صديق:
لحد إمتي هتفضل مضرب عن الحياة الزوجية والجنس الآخر؟
يابني إنت مزهقتش
مافيش في حياتك واحدة خالص
تكلمها وتكلمك , تحبها وتحبك
كله شغل و دراسة وقراية
يابني لازم تشوفلك حل
أنا خايف تكون مصاب بــــ........
بقي كل البنات دول مش عاجبينك
طب هنشوفلك مين؟ وفي دماغك إيه؟
وبشبة تلقائية
تغيرت ملامحي لملامح بطل رواية الأبلة لدستوفيسكي
بصورة أوحت له
بأني منذ لحظات قصيرة إستيقظت من النوم
وبهتاف من حنجرتي المسكينة أشبه إلي الزعيق
كهتاف
المعلم أرسطو في تلاميذه
أو
المسيح عليه السلام في حواريه
أو
عضو مجلس شعب حرامي في أهالي بلدته
يا صديقي
أنا أعشق الحرية Freedom
الحياة التي لا تسمع فيها
من الآخر القاطن معك في نفس الموطن
هات
روح
ليه عملت كده
إنزل
نسيت أقولك
إنه الملل يا صديقي العزيز
يا عني أنا بدل ما أقراء كتاب
أو أشاهد التلفاز
أو ألعب بجيتاري
أو أسافر
براحتي بكامل حريتي ورغبتي
أروح للصيدليات
علشان أجيب لبن بودره أو بامبرز أو خلافه
ياعم حرام والله حياتي كده أفضل بكتير
عايش بحرية ما بعدها حرية بلا وجع دماغ
وقلت له مقولة لتوفيق الحكيم
" النساء لا تؤنس الوحدة .
فهي دائماً تدخل وحدها أول الأمر .
وإذا دخلت تدخل خلفها كل متاعب الحياة"
قال: واليأس متملك
طيب أنا قلت لمراتي تشوفلك بنت كويسه من العيلة
وعزمتها علي الفطار عندنا
تعالي أفطر معنا وبالمرة تشوفها
وبعدين قول رأيك؟
قلت له ببلاهة
فكك مني!!
قال والبنت ومراتي والفطار
قلت له
أنا أفضل ليا
أهيم في الشوارع
مثل: المشردين أو الثكلي أو Homeless
علي إني أشارككم في الكلام الفارغ ده
وداعاً يا صديقي المتزوج البائس
أنا سعيد كده
وتركته خلفي
يلعن شياطنة السماء وأبالسة الأرض
علي أنه عرفني يوماً ما
وأكيد عنده حق!!!!
.......................

-2-

هو الغريب
مش إن الكهرباء يحصل فيها أزمة السنة الحالية
لسبب بسيط
إننا عايشين في أزمة من خمسين سنة
( مع بداية الحكم الجمهوري)
وبره مش غريب
يقولولك في قنواتهم الفضائية
أن هناك نقص في الطاقة المحركة للمولدات ( الغاز الطبيعي)
وبرده مش غريب
إننا من سنوات صدرنا نفس الغاز الذي يمدنا بالطاقة
إلي المستوطنة العبرية المعروفه باسم اسرائيل
ومتفاجأتش برده بمساله
إننا هنستورد الغاز من دولتي الخليج قطر والعراق
لسد احتياجاتنا
أو حتي من المستوطنات العبرية ب7 أمثال الثمن
لكن ما دهشني
وجعلني أصيح بصوت جهوري شاذ
أثناء التحديق في فاتورة الغاز الطبيعي
لأجد أنني سأدفع مبلغ 30 جنية مصري لا غير
فهتفت صائحاً:
يا تري شقيقي المواطن الإسرائيلي
فتورة غازه (غازنا طبعا) بيدفع كام شيكل!!!
فما كان من محصل الفاتورة أن تراجع للوراء بضع خطوات
وهمس في خوف قائلاً لي:
ممكن حضرتك تتصل بالشركة
علشان تتأكد من قراءة عداد الغاز!!!!

........................

-3-

وكعادتي مشاهدتي للتليفزيون في شهر رمضان
مبتابعش غير مسلسل واحد فقط
أتوسم فيه الخير أو يكون هادف
لكن السنة دي اخترت مسلسل
بدافع فضولي بحت محض
وهو مسلسل "الجماعة" للكاتب وحيد حامد
رغم أنني لا أنتمي لتلك الجماعة
المتسعة الرقعة وعريضة الأفراد
عكس مصطلح رجال الثورة1956م " الجماعة المحظورة"
تابعت المسلسل كي أأوكد لنفسي
عدم نزاهة أو صدق ما يعرض في تلك الشاشة الصغيرة
كنزاهة الإنتخابات أو الإستفتاء أو الإستعباط
فتوصلت إلي ما يلي:-



1- الإخوان كائنات مريضة هبطت علينا من كوكب آخر.



2- أفرادها مستوطنين يقتنون داخل جيتو
خاص بهم تفوح منه رائحة روث الخنازير.



3- هم مجموعة وظيفية متطفلة ترممية
تعيش علي قوت وعرق الجوانيم (العامة).



4- حسن البنا شخص وصولي مدلس كذاب منافق
لا يؤمن بإلله محدد أو يؤمن به إن دعته الحكمه لذلك.


5- بن جوريون وموشي ديان وايهود بارك
وأتاتورك وهتلر ,المثل الأعلي لهذا الحسن البناء.



6- يخلط البنا بين
الدين والسياسة والإقتصاد والتعليم
والأحزاب وشرب الشاي والإقتصاد وطربوشه
ليكون مخلوطاً يسمي بالدين الأخواني.


7- يشتري أفراد الشرطة ورجال الحكومة
مستلزمات معيشتهم من مأكل ومشرب من محلات الإخوان.



8- كوب الشاي داخل نيابة أمن الدولة
أنظف وأكبر حجماً من كوب الشاي في أي مكان تاني.


9- الإخوانجي رأسمالي متسالق
أما المتحزب رجل متقشف ينفع الآخرين.



10- من يحمل مصحف لأي غرض سواء
في أي وسيلة مواصلات
أو داخل مكتبه
أو أثناء قيادته للدراجة الهوائية
فهو أخواني بلا أدني شك.


11- الخطر الإخواني أشد خطراً
من الخطر الصهيوني
أو (الشيعي : بالعقلية السلفية الحالية)



12- المواطن المصري العادي البسيط مواطن واعي وثقف
يميز بين الخبيث و الطيب , ويري الحلال والحرام
واضح كقرص الشمس الأحمر في كبد السماء
علي إقتناع بأن الناس صنفان أخوان وحكومه
الصنف الأول كفار
والصنف الثاني قوم مؤمنون.



13- الجهاز البوليسي ذي الفل
ناس بجد تحبهم ولاد بلد كأنهم أهلك بالظبط
وتحس إن نفسك تتحبس عندهم للتين تلاته
( فكرني بصديق ليا
حاول يهاجر لفرانسا بطريقة غير شرعية
قالي يا أخي
دا أنا نفسي أروح
علشان أتمسك وأتحبس عند العالم
دي أنا مكنش ناقصني حاجه جوة السجن مبالك بره).



14- ظابط أمن الدولة راجل متدين يحترم حقوق الإنسان
يغلب مشاعره الوطنية علي إنتمائاته الحزبية والسياسية.



15- الملك فاروق بيحب الشعب المصري وغيور علي الوطن
وبجد أحمد الفيشاوي خلاني أعيط من تأثري !



16- جماعة الإخوان طبقتان
الأولي متسلقة منتفعة تؤمن بمبدأ
اعقد قرانك علي بنت ابليس إن لزم الأمر
أما الثانية
مغلوبه علي أمرها فقيرة تطمع في رضوان الإخوان
و بعض المناصب البسيطة والمكافئات الرمزية.



ورغم النقاط الستة عشر السابقة
وتقديمها برؤية متفرج عادي جداً
لا يؤمن بأخوان أو بوطني أو بمعارض
باختصار مواطن متفرج
لكنه سأل نفسه سؤال
يا تري الكاتب الفذ المعلوماتي وحيد حامد
سيقدم لنا مسلسل في رمضان القادم إن شاء الله
يحمل عنوان "الحزب"؟؟؟

.......................

-4-

وكالعاده
ومع منهجية أقراء أي كلمتين
من أي مكان
وأصحي الصبح بدري
وتعلي أقف علي منبر المسجد
وأطرب المصلين
بكلام
لا علمي
ولا ديني
ولا هادف
أو حتي أدبي أو أخلاقي
جاء خطيب الجمعة السابقة
وفي شهر كريم ذي ده والناس صايمة وحرانه
ومش مستحملة غباء
فجأنا الخطيب العبقري فلته زمانه ومكانه
كأنه يتحول
مثل شخصيات فيلم Transformers
يحمروا لنا عيونه
ويمد زراعه أمامنا قدر المستطاع
ويفتح فاه
ليكشف عن جميع محتويات فمه
من لسان وأسنان ولسان مزمار
قائلاً:
" أحبتي في الله
لقد وهبنا الله نعمه بالغة الأهمية
نحن كما تعلمون
أننا نستخدم السبحة في تسبيح رب العباد
ونلبس الطواقي ( أتباع السلفية)
التي تقينا من ألسنة الشمس
ونرتدي الجلباب الأبيض الناصع
ونصلي علي السجادة صلواتنا الخمسة
, فهل تعلمون أين صنعت؟؟
نعم أحبتي نعم إنهم قوم يأجوج ومأجوج
الصينيين الكفره الفجرة
لقد جعلهم الله عبيداً لنا
كي يصنعوا لنا تلك الأشياء
ويصدروها لنا ونحن نأتي وبكل سهوله
وبدون تكلفه
نستخدمها نحن المسلمون لعباده رب العباد
نعم أحبتي إنهم كفره أغبياء منتجون للصناعات
ونحن مؤمنون أذكياء نستورد ما ينتجوه "
وفجأه
وبلا مقدمات أو مؤخرات
هاج المسجد وماج
وهتف أحد المصلين من خلفي
" تذكرت أفلام الكفار والهجرة والشمياء المللة"
أنزلوا الراجل ده من هنا إيه التخلف ده؟
بدل ما......
همست لنفسي قائلاً في استسلام للقدر واضح
بدل ما يجري ليا حاجه
وأنا لسه في عز شبابي ياعني 26 سنه
حرام أموت بالضغط
ساخطاً علي هذا الخطيب وأنا قاعد في مسجد
قلت أنام لحد ما يخلص وقد كان!!!!

.........................

-5-

يعيش الطلاب في سجن قصير لمده 12 عام ثم يفك الله اسره ويحرر
بينما يعيش المعلم في ذلك السجن مدي الحياة وبدون تخفيف أي أحكام
فيا إلهي أرحمني من هذا المعتقل الكريه
.......................

-6-

هناك كتابان يصفان طبيعة الشخصية المصرية
الأول كتاب د. جمال حمدان " عبقرية الشخصية المصرية"
يري المصري بطبيعته عبقري فذ
والثاني كتاب محمود السعدني " مصري من تاني"
يري المصري انسان مغلوب علي أمره إمعه لا ناقه له ولا جمل
ورغم حبي لجمال حمدان
إلا إني مع أبونا الراحل محمود السعدني
بأننا شعب إمعه يفسد ويسعد بفساد أو سعاده حاكمه.

...............................

-7-

طبعا الواد راح مع أبوه بلاد العام سام
مش علشان يبر بالثاني (ابوه) ولا يبر بزوجته
التي تطمح في منصب رفيع
يطيح بكرسي حماتها اللدوده لتحل ملحها
وبرده مش تلبيه للمرتزقه والمنتفعين والموالسين
اللي عاوزين الواد يحكم عزبه أبوه المريضة
برده مش علشان العزبه مافيهاش رجاله
ذي قرية المزاريطة " في مسلسل أحمد مكي"
لكن الواد الناصح
لقي أن سياسة حكم أبوه للعزبة
طوال العقود السابقة دي غلط في غلط
وبدافع حبه
و انتماءه للعزبة
قرر أن يأخذ من أبوة دفه القيادة
ويبقي حاكم العزبه الأبدي
مثل الزواج الكاثولويكي
لا ينفع معه أحكام القضاء المدني
ولكننا نتظر كلمة رب القضاء

.................................

-8-

مافيش مشكلة إن الجامعات العربية والمصرية
متدخلش في تصنيف أفضل 500 جامعة علي مستوي العالم لعام 2010
وبما إني أحمل جنسية مصرية
وحاصل علي منحة من أعرق جامعات أمريكا والعالم
ألا وهي جامعة هارفارد
بتمني يجي اليوم
اللي يتغلي فيه التعليم في مصر تماماً واطية وعالية
ونتعلم عبر الإنترنت أو القنوات الفضائية أو الكتب
بدون تلك الوزارات أو بيها مالهاش مش هيتغير أي حاجه

.................................

-9-

في سؤال غريب محيرني ومالوش إجابة في ذهني
ياتري أنهي الجمل التالية تعتبر صحيحة؟
أنا مواطن مصري , أحب وطني مصر.
أم
أنا مواطن مصري , أحب بلدي مصر.

...............................

( تنبية قصير لابد منه)
ياتري
مسألتيش نفسك
إيه لزمتها رسالتك ليا الوقتي ؟
فكرانا هنرجع تاني ؟
فكراني هرجع الحب والكلام الفارغ ده؟
خلاص يا صاحبة SmS
اللي فات مات
ومش هيرجع تاني
لا معاكي ولا مع غيرك
وبعدين صحيح؟
مش إنتي إتجوزتي
ذي ما قولتي ليا في أخر رسالة؟
ولا فيه إيه بالظبط؟
صدقيني الحياة من غيرك أفضل بكتير
بجد أنا في قمه سعادتي من غيرك

.......................................

كتب تقرأ هذا الشهر( 2010/9)

محمد الغزالي: فن الذكر والدعاء عند خاتم الأنبياء , دار الشروق , 2008.

عبد الوهاب المسيري: الصهيونية والنازية ونهاية التاريخ , دار الشروق , 2005.

بلال فضل: ضحك مجروح , دار الشروق , 2010.

جورج برنارد شو: جان دارك , لجنة التأليف والترجمة والنشر , , 1963.

إبراهيم عبد العزيز: الملف الشخصي لتوفيق الحكيم , دار المعارف , 1992.

رضوي رشوان: أطياف,روايات دار الهلال , 1999.

أحمد خالد توفيق: يوتوبيا , مريت , 2008.

والتر إيزاكسون: أينشتاين حياته وعالمة , كلمات عربية , 2010.

جورج استاين: بين تولستوي ودوستوفيسكي , الهيئة المصرية العامة للكتاب , 1985.

عباس محمود العقاد: علي الإثير , دار المعارف , 1989.

ألبير كامي: الغريب , الدار المصرية للبنانية , 1997.

تشارلز ديكنز: قصة مدينتين , دار العلم للملايين , 2006.

نيكولاي جوجول: المفتش , , وزارة الإعلام الكويتي , 268ع , 1994.